Gürcüstanın Batumi şəhərində dünya seriyalı “WTT Youth Contender” turniri davam edir. Bu gün seçmə komandamızın aktivinə daha bir medal əlavə olunub. 13 yasadək idmançıların mübarizəsinə qatılan Onur Quluzadə yalnız yarımfinalda uduzaraq bürünc medala layiq görülüb.
Xatırladaq ki, yarışın ilk günlərində mübarizəyə qatılan Zemfira Mikayılova, Ləman Abdulhəmidova, Nigar Mahmudova, Xədicə Əbilzadə, Mərziyyə Nurmətova, Aylin Əsgərova, Arzu Aslanova, Aysu Ağayeva, Xədicə Eylazova və Yağmur Məmmədlidən ibarət komanda turniri 9 medalla başa vurub.

Gürcüstanın Batumi şəhərində keçirilən dünya seriyalı “WTT Youth Contender” turnirində uğurla çıxış edən qızlardan ibarət komandamız Vətənə qayıdıb. Stolüstü tennisçilərimizi Heydər Əliyev Beynəlxalq Aeroportunda ASTF-nin rəsmiləri və idmançıların doğmaları qarşılayıblar. Xatırladaq ki, məşqçilər Fərhad İsmayılov və Elnur Hidayətzadənin rəhbərliyi ilə Zemfira Mikayılova, Ləman Abdulhəmidova, Nigar Mahmudova, Xədicə Əbilzadə, Mərziyyə Nurmətova, Aylin Əsgərova, Arzu Aslanova, Aysu Ağayeva, Xədicə Eylazova və Yağmur Məmmədlidən ibarət komanda turniri 2-si gümüş, 7-si bürünc olmaqla 9 medalla başa vurub. Onu da, qeyd edək ki, idmançılarımız yarış zamanı qarşılaşdıqları 8 erməni rəqibi məğlubiyyətə uğradıblar.

Stolüstü tennisçilərimiz Gürcüstanın Batumi şəhərində keçirilən dünya seriyalı “WTT Youth Contender” turnirində növbəti mükafatları qazanıblar. Qarışıq-qoşa yarışlarda Adil Əhmədzadə - Mərziyyə Nurmətova tandemi ilə Ləman Abdulhəmidova və belçikalı Tom Klosset cütü yalnız finalda uduzaraq gümüş medal qazanıb. Aylin Əsgərova ilə Hüseyn Eylazov, Zemfira Mikayılova ilə türkiyəli həmkarı Məhəmməd Ataqul isə bürünc mükafata layiq görülüb.

Xatırladaq ki, idmançılarımız yarışın ilk günlərində daha 5 bürünc medal qazanmışdılar.
Sabah seçmə komandamızın üzvləri Adil Əhmədzadə, Rüstəm Hacılı, Hüseyn Eylazov, Onur Quluzadə və Tunar Bağırov şəxsi yarışlarda mübarizəyə qatılacaq.

Gürcüstanın Batumi şəhərində keçirilən dünya seriyalı “WTT Youth Contender” turnirində qızların yarışına yekun vurulub. Bu gün seçmə komandamızın daha iki üzvü bürünc mükafata layiq görülüb. Mərziyyə Nurmətova 15 yaşadək, Ləman Abdulhəmidova isə 19 yaşadək idmançıların mübarizəsində bu nəticəyə imza atıb.
Xatırladaq ki, turnirin ilk günlərində 17 yaşadək idmançıların mübarizəsinə qatılan Mərziyyə Nurmətova ilə Aylin Əsgərova üçüncü yeri tutmuşdu. Yağmur Məmmədli isə 13 yaşadək idmançılar arasında eyni nəticəni göstərmişdi.
Qeyd edək ki, sentyabrın 21-dən 24-dək məşqçi Ramil Cəfərovun rəhbərliyi ilə Adil Əhmədzadə, Rüstəm Hacılı, Hüseyn Eylazov, Onur Quluzadə və Tunar Bağırovdan ibarət komanda Batumi sınaqlarında mübarizə aparacaq.

Stolüstü tennisçilərimiz Gürcüstanın Batumi şəhərində keçirilən dünya seriyalı “WTT Youth Contender” turnirində inamla çıxış etməkdədirlər. 17 yaşadək idmançıların mübarizəsinə qatılan Mərziyyə Nurmətova ilə Aylin Əsgərova yalnız yarımfinalda uduzaraq yarışı üçüncü pillədə başa vurub. Yağmur Məmmədli 13 yaşadək idmançılar arasında eyni nəticəni göstərib.
19 yaşadək stolüstü tennisçilərin turnirində qüvvəsini sınayan Zemfira Mikayılova, Ləman Abdulhəmidova və Xədicə Əbilzadə qrup mərhələsini inamla adlayaraq sabah keçiriləcək 1/8 finala vəsiqə qazanıb. Yeri gəlmişkən, qrup oyunlarında Ləman Abdulhəmidova Asya Poqosyanı 3-0, Zemfira Mikayılova Ellada Gevorqyanı 3-1, Nigar Mahmudova isə Mariam Ambarsumyanı 3-2 hesabı ilə məğlubiyyətə uğradıb.
15 yaşadək stolüstü tennisçilərin yarışında isə Mərziyyə Nurmətova, Aylin Əsgərova, Aysu Ağayeva, Arzu Aslanova və Yağmur Məmmədli 1/8 finala vəsiqə qazanıb.