Yeniyetmə stolüstü tennisçilərimiz iyulun 6-dan 15-dək Serbiyanın paytaxtı Belqradda keçiriləcək Avropa birinciliyinə hazırlığı davam etdirirlər. Hazırlıq prosesinin növbəti mərhələsi bu gün Xaçmaz Olimpiya İdman Kompleksində yekunlaşıb. Seçmə komandanın məşqçisi Elnur Hidayətzadə təlim-məşq toplanışı, idmançıların hazrlıq səviyyəsi və qitə birinciliyindəki imkanlar barədə sualları cavablandırıb:
-Yeniyetmə stolüstü tennisçilərimizi qarşıda ciddi sınaq gözləyir. Seçmə komanda Avropa çempionatına necə hazırlaşır?
-Komandamız yarışa çox ciddi şəkildə hazırlaşır. Azərbaycan Stolüstü Tennis Federasiyası il ərzində müxtəlif yaş qrupları üzrə seçmə komandaların təlim-məşq toplanışlarını təşkil edir ki, bu da, beynəlxalq yarışlara lazımı hazırlıq üçün olduqca əhəmiyyətlidir. Bildiyiniz kimi 2 il pandemiya dövründə beynəlxalq yarışlarda iştirak etməmişik. Pandemiyadan sonra ilk dəfədir ki, belə bir motəbər yarışa qatılacağıq. Seçmə komandanın heyəti 13-14 yaşlı Azərbaycan çempionlarından təşkil olunub. Avropa birinciliyində isə, əsasən 15 yaşlılar qüvvələrini sınayacaqlar. Bu baxımdan idmancilarımızın özlərindən böyük rəqiblərlə qarşılaşacağını söyləmək olar. Bu heyət gələn il artiq öz yaş qrupunda nübarizə aparacaq.
-Xaçmaz Olimpiya İdman Kompleksində təşkil olunan təlim-məşq toplanışı haqqında ətraflı məlumat verərdiniz. Hazırlıq hansı plan üzrə aparılırdı? Komandada əhval-ruhiyyə necədir?
-10 gün Xaçmaz Olimpiya İdman Kompleksində təlim-məşq toplanışı keçirildi. Bu toplanışda idmançılarla əsasən texniki - taktiki hazırlıq üzərində iş apardıq. Nəticələrdən razıyam. Avropa birinciliyinə son məşqlərimizi Bakida keçirəcəyik. Komandada əhval-ruhiyyə yüksək səviyyədədir. İdmançılarımız səbirsizliklə yarışa qatılacaqları günü gözləyirlər. Ümid edirəm ki, onlar etimadı layiqincə doğruldacaqlar.
-Avropa birinciliyinin püşkatmasını necə dəyərləndirirsiniz? Rəqibləri yəqin ki, analiz etmisiniz...
-Rəqiblərimizi tanıyırıq. Oğlanların qrupunda ən güclü rəqiblərdən biri Avstriya komandasıdır. Bu komanda daim Avropa birinciliklərində yüksək nəticələr göstərib. Qizların yarışında isə, İsveç komandasını xüsusi vurğulamaq olar. Bu kollektiv də müntəzəm olaraq mükafatçılar sırasında yer alıb. Digər rəqiblərimizdən Sloveniya, Monteneqro və Yunanıstan seçmələrini də, fəqrləndirə bilərəm.
-Komandanın yarışa hazırlığını və rəqiblərin imkanlarını nəzərə alaraq, Avropa birinciliyində hansı nəticələrə ümid bəsləyə bilərik?
-Qitə birinciliyi həmişə çox gərgin mübarizə şəraitində keçir. Yəqin ki, bu dəfə də istisna olmayacaq. Belqrad sınaqları pandemiyadan sonra ilk böyük yarışlardan biridir və hər bir komanda bütün bacarığını ortaya qoymağa çalışacaq. Biz də, ölkəmizi layiqincə təmsil etmək üçün əlimizdən gələni əsirgəməyəcəyik.

Yeniyetmə stolüstü tennisçilərin Avropa çempionatının püşkü atılıb. Monteneqronun Podqoritsa şəhərində təşkil olunan mərasimdə Azərbaycan seçmə komandalarının da rəqibləri müəyyənləşib. Püşkün nəticələrinə əsasən oğlanlardan ibarət komandamız “E” qrupunda Avstriya və Sloveniya seçmələri ilə mübarizə aparacaq. Qızlardan ibarət Azərbaycan milli komandası isə “H” qrupunda İsveç, Yunanıstan və Monteneqro kollektivləri ilə yarışacaq. İdmançılar komanda turniri ilə yanaşı şəxsi, qoşa və qarışıq qoşa yarışlarında da bacarıqlarını göstərəcəklər. 15 yaşadək stolüstü tennisçilərin Avropa birinciliyi iyulun 6-dan 15-dək Serbiyanın paytaxtı Belqradda keçiriləcək. Mötəbər yarışda məşqçilər Elnur Hidayətzadə və Ramil Cəfərovun rəhbərliyi ilə
Arzu Aslanova, Aylin Əsgərova, Mərziyyə Nurmətova, Adil Əhmədzadə, Hüseyn Eylazov və Onur Quluzadə qələbə uğrunda mübarizə aparacaq. Beynəlxalq dərəcəli hakimlər Könül Mikayılova ilə Zaur Mikayılov da, Avropa çempionatında ölkəmizi təmsil edəcək.

Yeniyetmə və gənc stolüstü tennisçiləri qarşıda ciddi sınaq gözləyir. Seçmə komanda iyulun 6-dan 15-dək Serbiyanın paytaxtı Belqradda keçiriləcək Avropa çempionatında mübarizə aparacaq. Mötəbər yarışa hazırlıq məqsədi ilə növbəti təlim-məşq toplanışı Xaçmaz Olimpiya Kompleksində təşkil olunub. Məşqçilər Elnur Hidayətzadə və Ramil Cəfərovun rəhbərliyi ilə iyunun 16-dan 26-dək keçiriləcək hazırlıq prosesində Ləman Abdulhəmidova, Arzu Aslanova, Aylin Əsgərova, Mərziyyə Nurmətova, Hacımurad Məmmədbəyov, Toğrul Məhəmmədov, Adil Əhmədzadə, Rüstəm Hacılı, Hüseyn Eylazov və Onur Quluzadə iştirak edir. Xatırladaq ki, bu, Avropa çempionatına hazırlıq məqsədi ilə təşkil olunan 3-cü təlim-məşq toplanışıdır. Yeniyetmə və gənc stolüstü tennisçilər bundan əvvəl Qax Olimpiya İdman Kompleksi və Türkiyənin Yalova şəhərində keçirilən hazırlıq prosesində də bir araya gəlmişdilər.

28 may Müstəqillik Gününə həsr olunan stolüstü tennis üzrə ənənəvi “Top-8” turniri keçirilib. Yarışa ölkə çempionatında ilk 8 yeri tutan idmançılar qatılıb. “Şüa” İdman Kompleksində keçirilən turnirin açılış mərasimində iştirakçıları salamlayan Azərbaycan Stolüstü Tennis Federasiyasının baş katibi Könül Mikayılova bu cür turnirlərin qarşıdakı beynəlxalq yarışlara hazırlıq baxımından əhəmiyyətli olduğunu bildirib.
Şəxsi xarakter daşıyan yarışda kişilərdən Emin Məmmədov, Adil Əhmədzadə, Nihad Məmmədov, Vəzir Allahverdiyev, Hüseyn Eylazov, Xəyal Həşimli, İbrahim Ansari, Əliverdi Şahgəldiyev qüvvəsini sınayıb. Qadın tennisçilərdən isə, Rüfət Əliyeva, Məryəm İmanova, Nəzakət Qarayeva, Mərziyə Nürmətova, Ləman Abdulhəmidova, Zemfira Mikayılova, Aliyə Haşımova və Billurə Eminova qələbə uğrunda mübarizə aparıb. Dairəvi sistem üzrə 2 yarımqrupda keçirilən turnirin nəticələrinə əsasən kişi tennisçilərdən Emin Məmmədov baş mükafata layiq görülüb. Vəzir Allahverdiyev 2-ci, Nihad Məmmədov 3-cü yeri tutub. Qadınların yarışı Ləman Abdulhəmidovanın qələbəsi ilə yekunlaşıb. İlk üçlüyü müvafiq olaraq Mərziyyə Nurmətova ilə Nəzakət Qarayeva tamamlayıb.
Qeyd edək ki, stolüstü tennisçilərin idman ustalığını artırmaq, qarşıdakı beynəlxalq yarışlara hazırlıq və bu idman növünün təbliği məqsədi ilə keçirilən turnirin qaliblərinə Azərbaycan Stolüstü Tennis Federasiyasının diplom və hədiyyələri təqdim olunub.

Stolüstü tennisçilərimiz daha bir ciddi sınaq qarşısındadırlar. Yeniyetmələrdən ibarət seçmə komandalar beynəlxalq “Pro Tur” yarışlarında iştirak edəcəklər. Oğlan tennisçilər mayın 16-dan 18-dək Almaniyanın Berlin şəhərində, 20-dən 22-dək Polşanın Vladislava şəhərində təşkil olunacaq turnirlərə qatılacaqlar. Qızlar isə mayın 16-dan 18-dək Vladislavada, 20-dən 22-dək Berlində keçiriləcək yarışda bacarıqlarını göstərəcəklər. Hər iki komanda ənənəvi yarışa böyük həvəs və qələbə əzmi ilə hazırlaşır. Qax Olimpiya İdman Kompleksində və Türkiyənin Yalova şəhərindəki təlim-məşq toplanışlarını başa vuran tennisçilər, məşqçilər Elnur Hidayətzadə və Ramil Cəfərovun rəhbərliyi ilə hazırlıq prosesini Bakıda davam etdirirlər.

Beynəlxalq turnirlərdə ölkəmizin idman şərəfini oğlanlardan Hüseyn Eylazov, Adil Əhmədzadə, Rüstəm Hacılı və Onur Quluzadə, qızlardan isə, Arzu Aslanova, Aylin Əskərova, Yağmur Məmmədli və Mərziyə Nürmətova qoruyacaq.
Qeyd edək ki, bu yarışlarda iştirakın əsas məqsədi iyul ayında Belqradda keçiriləcək Avropa birinciliyinə hazırlıqdır.