Istedadlı stolüstü tennisçi Onur Quluzadə daha bir yarışa qatılıb. Seçmə komandamızın üzvü Rusiyanın Sankt-Peterburq şəhərində keçirilən Nikolay Nikitinin xatirəsinə həsr olunmuş beynəlxalq turnirdə bacarığını göstərəcək. O, sayca XXIII olan ənənəvi yarışda 2010-cu il təvəllüdlü idmançıların mübarizəsində etimadı doğrultmağa çalışacaq. Qeyd edək ki, Onur Quluzadə bu turnirə hazırlıq üçün seçmə komandanın baş məşqçisi Mixail Timofeyevin rəhbərliyi ilə noyabrın 11-dən 26-dək Çində təşkil olunan beynəlxalq təlim-məşq tolanışında iştirak edib.

Azərbaycan Stolüstü Tennis Federasiyası son beynəlxalq yarışlarda fərqlənən idmançıları mükafatlandırıb. Söhbət Misirin paytaxtı Qahirədə keçirilən dünya seriyalı “WTT Youth Contender” turniri və Latviyanın paytaxtı Riqada təşkil olunan “Riga City Council's Youth Cup” yarışında fəxri kürsüyə qalxan Adil Əhmədzadə, Tunar Bağırov, Mərziyyə Nurmətova, Zemfira Mikayılova, Arzu Aslanova, Aylin Əsgərova və Xədicə Eylazovadan gedir. Mükafatları seçmə komandanın üzvlərinə ASTF-nin baş katibi Könül Mikayılova təqdim edib.

Stolüstü tennis üzrə beynəlxalq dərəcəli hakim Zaur Mikayılov xüsusi mükafata layiq görülüb. Ona Qazaxıstanın Türkistan şəhərində keçirilən Türkdilli xalqların II Universiadasında “Ən yaxşı hakimliyə görə” kuboku təqdim olunub. Qeyd edək ki, 2010-cu ildən beynəlxalq dərəcəli hakim adını alan Zaur Mikayılov Avropa çempionatı, İslam Həmrəyliyi Oyunları, Avropa “Top-16” kuboku kimi nüfuzlu yarışlarda ədalət təmsilçisi olub. Təcrübəli mütəxəssis həmçinin Avropa Çempionlar Liqasının final görüşünün də baş hakimi olub.

İstedadlı stolüstü tennisçimiz Onur Quluzadə ustalıq səviyyəsinin artırılması məqsədi ilə daha bir beynəlxlaq toplanışda iştirak edəcək. O, məşqçi Mixail Timofeyevin rəhbərliyi ilə noyabrın 11-dən 26-dək Çinin “Hebei Zhenqdinq Stolüstü Tennis Təlim Bazası”nda hazırlıq prosesi keçəcək. Seçmə komandamızın üzvü ardınca noyabrın 28-dən dekabrın 3-dək Sankt-Peterburqda keçiriləcək beynəlxalq yarışa qatılacaq. Qeyd edək ki, qitənin ən istedadlı stolüstü tennisçilərindən sayılan Onur Quluzadə mütəmadi olaraq beynəlxalq təlim-məşq toplanışlarına dəvət alır.

Yeniyetmə stolüstü tennisçilərimiz növbəti təlim-məşq toplanışına qatılacaqlar. Seçmə komandanın 12 üzvü bu məqsədlə Türkiyəyə yollanıb. İdmançılarımız məşqçi Elnur Hidayətzadənin rəhbərliyi ilə 11-20 noyabr tarixlərində Yalova şəhərində keçiriləcək toplanışda iştirak edəcəklər. Fiziki və taktiki-texniki keyfiyyətlərin yüksəldilməsi məqsədi ilə təşkil olunan hazırlıq prosesində yerli idmançılarla görüşlər də nəzərdə tutulub. Qeyd edək ki, mütəmadi şəkildə həyata keçirilən bu cür toplanışlar qarşıdakı mühüm beynəlxalq yarışlara hazırlıq baxımından əhəmiyyətlidir.

Stolüstü tennisçilərimiz Qazaxıstanın Türkistan şəhərində keçiriləcək Türkdilli xalqların II Universiadasına qatılacaqlar. Sabah başlanacaq mötəbər yarışda 6 idmançımız mübarizə aparacaq. Seçmə komandanın baş məşqçisi Fərhad İsmayılovun rəhbərliyi ilə qızlardan Zemfira Mikayılova, Ləman Abdulhəmidova, Xədicə Əbilzadə, oğlanlardan Nihad Məmmədov, Kənan Pənahov və Fəxri Abdullayev etimadı doğrultmağa çalışacaq. Zaur Mikayılov isə bu yarışda hakim kimi iştirak edəcək. Mübarizəyə noyabrın 9-da yekun vurulacaq.

Azərbaycan Gənclər və İdman Nazirliyi və Azərbaycan Stolüstü Tennis Federasiyasının təşkilatçılığı ilə Zəfər Gününə həsr olunmuş stolüstü tennis üzrə ölkə birinciliyinə yekun vurulub. Xəbər verdiyimiz kimi “Şüa İdman Kompleksi”ndə keçirilən yarışda paytaxt və bölgələrdən 2011-ci il və daha kiçik təvəllüdlü 70-ə yaxın idmançı bacarığını göstərib.
Gərgin və maraqlı mübarizənin nəticələrinə əsasən qızlar arasında Yağmur Məmədli ölkə çempionu adını qazanıb. Banu Baytallı ikinci, Leyli Məmmədova ilə Rüqəyya Qasımzadə üçüncü yeri tutub.
Oğlanların mübarizəsi Onur Quluzadənin qələbəsi ilə nəticələnib. Şakir Qədirov ikinci, Vaqif Babayevlə Ruslan Kərimov üçüncü olub.
Fərqlənən idmançılara AGİN-in diplom və medalları, həmçinin ASTF-nin mükafatları təqdim olunub.
Qeyd edək ki, birinciliyin təşkilində əsas məqsəd Azərbaycan tarixinin ən önəmli səhifələrindən sayılan Zəfər Gününün təbliği və uşaqlarda vətənpərvərlik hissinin aşılanmasıdır. İki gün davam edən yarışlar həmçinin yeni istedadların üzə çıxarılması baxımından da əhəmiyyət daşıyıb.

Azərbaycan Gənclər və İdman Nazirliyi və Azərbaycan Stolüstü Tennis Federasiyasının təşkilatçılığı ilə Zəfər Gününə həsr olunmuş stolüstü tennis üzrə ölkə birinciliyinə start verilib. “Şüa İdman Kompleksi”ndə keçirilən yarışda paytaxt və bölgələrdən 2011-ci il və daha kiçik təvəllüdlü 70-ə yaxın idmançı bacarığını göstərir. Birinciliyin təşkilində əsas məqsəd Azərbaycan tarixinin ən önəmli səhifələrindən sayılan Zəfər Gününün təbliği və uşaqlarda vətənpərvərlik hissinin aşılanmasıdır. İki gün davam edəcək yarışlar həmçinin yeni istedadların üzə çıxarılması baxımından da əhəmiyyətlidir. Qeyd edək ki, fərqlənən idmançılara AGİN-in diplom və medalları, həmçinin ASTF-nin mükafatları təqdim olunacaq.