Azərbaycan Stolüstü Tennis Federasiyası bu gün hakimlər üçün seminara start verib. “Şüa İdman Kompleksi”ndə təşkil olunan tədbir hakimlərin respublikadaxili və beynəlxalq yarışlara hazırlığı məqsədi daşıyır. Beynəlxalq dərəcəli hakimlər Zaur Mikayılov və Fərhad İsmayılovun rəhbərliyi ilə keçirilən seminar yanvarın 30-da yekunlaşacaq.

Stolüstü tennisçilərimiz ilin ilk beynəlxalq yarışlarında iştirak edəcəklər. Adil Əhmədzadə, Rüstəm Hacılı, Onur Quluzadə, Mərziyyə Nurmətova, Aylin Əsgərova və Yağmur Məmmədlidən ibarət komanda bu məqsədlə Qətərə yola düşüb. İdmançılarımız baş məşqşi Mixail Timofeyev və məşqçilər Ramil Cəfərovla Elnur Hidayətzadənin rəhbərliyi ilə dünya reytinq turnirlərində mübarizə aparacaqlar. Seçmə komanda yanvarın 27-dən 30-dək “WTT Youth Contender Doha 2025” turnirinə qatılacaq. Yanvarın 31-dən fevralın 2-dək isə stolüstü tennisçiləri “WTT Youth Star Contender Doha 2025” yarışı gözləyir.

Stolüstü tennisçi Onur Quluzadə növbəti təlim-məşq toplanışına yollanıb. İstedadlı idmançı seçmə komandanın baş məşqçisi Mixail Timofeyevin rəhbərliyi ilə Çində hazırlıq keçəcək. Bu gün Şanxay şəhərində yerləşən "China Table Tennis College" mərkəzində başlanacaq təlim-məşq toplanışı yanvarın 19-da yekunlaşacaq.

Stolüstü tennis üzrə "Top 8" turnirinə yekun vurulub. "Şüa İdman Kompleksi"ndə təşkil olunan ənənəvi yarışda ölkənin ən güclü stolüstü tennisçiləri bacarıqlarını göstəriblər. Gərgin və maraqlı yarışın nəticələrinə əsasən, kişilər arasında Onur Quluzadə 1-ci olub. O, finalda Rüstəm Hacıliya qalib gəlib. Vəzir Allahverdiyev 3-cü yeri tutub. Qadınların turniri Aylin Əsgərovanın qələbəsi ilə nəticələnib. Mərziyyə Nurmətova fəxri kürsunün 2-ci, Ləman Abdulhəmidova 3-cü pilləsinə qalxıb. Fərqlənən idmançılara Azərbaycan Stolüstü Tennis Federasiyasının diplom və mükafatları təqdim olunub.

Sumqayıt şəhərində 2014-cü il təvəllüdlu və daha azyaşlı stolüstü tennisçilərin ölkə turniri keçirilib. “Qarabağ NN” klubunda təşkil olunan yarışda Bakı, Sumqayıt, Salyan, Şirvan, Şəki və Şabran idmançıları bacarıqlarını göstəriblər. 100-ə yaxın stolüstü tennisçinin qatıldığı turnir şəxsi xarakter daşıyıb. Gərgin və maraqlı mübarizənin nəticəsinə görə oğlanlar arasında Əliəkbər Mirzəliyev 1-ci, Cəfər Almədədli 2-ci, Saleh Hümbətovla Camal Kərim 3-cü yeri tutub. Qızların yarışı Mehri Aslanzadənin qələbəsi ilə nəticələnib. O, finalda Nailə Nəzirovaya qalib gəlib. Mehin Mirzəbalayeva ilə Zəhra Cəfərli 3-cü olub. Fərqlənən idmançılara Azərbaycan Stolüstü Tennis Federasiyasının hədiyyələri təqdim edilib.

Stolüstü tennisçilərimiz daha bir beynəlxalq yarışda iştirak edəcəklər. Ənənəvi “Finlandiya Open” turnirində seçmə komandamızın 12 üzvü bacarığını göstərəcək. Baş məşqçi Mixail Timofeyev və məşqçi Elnur Hidayətzadənin rəhbərliyi ilə, Hilal Həsənov, Vəzir Allahverdiyev, Nihad Məmmədov, Rüstəm Hacılı, Adil Əhmədzadə, Onur Quluzadə, Zemfira Mikayılova, Ləman Abdulhəmidova, Mərziyyə Nurmətova, Arzu Aslanova, Aylin Əsgərova və Yağmur Məmmədli etimadı doğrultmağa çalışacaq. Beynəlxalq dərəcəli hakim Zaur Mikayılov isə iki yaş qrupu üzrə keçiriləcək yarışın oyunlarını idarə edəcək. Sabah Lohja şəhərində start veriləcək “Finlandiya Open”ə dekabrın 8-də yekun vurulacaq.

10 yaşadək stolüstü tennisçilər növbəti təlim-məşq toplanışına cəlb olunublar. Ugurlu gələcək vəd edən istedadlı idmançılar bu dəfə Xaçmaz Olimpiya İdman Kompleksində bir araya gəliblər. Onlar bu gündən noyabrın 24-dək, məşqçilər Billurə Eminova, Qulu Quliyev və İsmayıl Mirzəyevin rəhbərliyi ilə hazırlıq prosesində iştirak edəcəklər. Təlim-məşq toplanışı stolüstü tennisçilərin bacarıqlarını təkmilləşdirmək və  onlara peşəkar idmançı vərdişlərini aşılamaq məqsədi daşıyır.

Stolüstü tennisçilərimiz qarşıdakı beynəlxalq yarışlara hazırlığı davam etdirirlər. Bugünlərdə seçmə komandanın 8 üzvü Çində təlim-məşq toplanışındadır. Daha 12 idmançı isə, bu məqsədlə Türkiyəyə yollanıb. Hilal Həsənov, Vəzir Allahverdiyev, Nihad Məmmədov, Rüstəm Hacılı, Adil Əhmədzadə, Hüseyn Eylazov, Zemfira Mikayılova, Ləman Abdulhəmidova, Səbinə Məmmədova, Xədicə Əbilzadə, Nigar Mahmudova və Aysu Ağayeva noyabrın 22-dək, baş məşqçi Fərhad İsmayılov, məşqçilər Elnur Hidayətzadə və Ramil Cəfərovun rəhbərliyi ilə Yalova şəhərində yerləşən “Masa Tennisi Salonu” kompleksində hazırlıq keçəcək. Stolüstü tennisçilər toplanış çərçivəsində həmçinin, İstanbul və Bursa şəhərlərində yoldaşlıq turnirlərində bacarıqlarını göstərəcəklər.