Bakı Şəhər Gənclər və İdman İdarəsi, “Regional İnkişaf” İctimai Birliyi və Azərbaycan Stolüstü Tennis Federasiyasının birgə təşkilatçılığı ilə iyulun 4-də yeniyetmələr arasında stolüstü tennis idman növü üzrə Bakı şəhər turniri keçirilib.

“Şüa” İdman-Sağlamlıq Kompleksində təşkil olunan yarışda, ümummillikdə 48 nəfər həvəskar idmançı bacarığını göstərib.

Beynəlxalq dərəcəli və respublika səviyyəli hakimlərin idarə etdiyi turnirdə oğlanlar arasında Ziya Mürşüdlü birinci, Səid Süleymanzadə ikinci, İsmayıl Məmmədovla Musa İsmayılov üçüncü yeri tutub. Qızların mübarizəsində Aynur Ağayeva qalib gəlib. Leyli Məmmədova ikinci, Mələk Əhmədzadə ilə Sürəyya Quluzadə üçüncü olub.
Turnir bağlanış tədbiri və mükafatlandırma ilə başa çatıb, qaliblərə diplom və hədiyyələr təqdim edilib.
Qeyd edək ki, yarışın keçirilməsində məqsəd yeniyetmə və gənclər arasında sağlam həyat tərzinin təbliği, idmana olan marağın artırılması, eyni zamanda onların asudə vaxtlarının səmərəli təşkilinə dəstək verilməsi idi.

Stolüstü tennis üzrə ölkə birinciliyinə yekun vurulub. Quba Olimpiya İdman Kompleksində təşkil olunan yarışda 2012-ci il və daha kiçik təvəllüdlü idmançılar bacarıqlarını göstəriblər. Üç gün davam edən yarışda paytaxt Bakı ilə yanaşı Sumqayıt, Salyan, Şirvan, Quba, Qobustan, Şamaxı, Şabran, Qax və Şəkidən ümumilikdə 100-dən artıq stolüstü tennisçi qələbə uğrunda mübarizə aparıb:
Şəxsi Qızlar:
I yer-Babazadə Xədicə
II yer- Mirzəbalayeva Mehin
III yer-Həbibova Yasəmən
III yer-Aslanzadə Mehri

Şəxsi Oğlanlar:
I yer- Babayev Vaqif
II yer-Muradov Zərbah
III yer-Mirzəliyev Əliəkbər
III yer- Yusifov Mirilkin

Qoşa qızlar:
I yer-Trofimenko Sofiya,Babazadə Xədicə
II yer- Mirzəbalayeva Mehin,Həbibova Yasəmən
III yer- Aslanzadə Mehri,Qasımzadə Ruqəyya
III yer-İmanverdizadə Banu,İlyasova Sofiya

Qoşa oğlanlar:
I yer- Babayev Vaqif,Muradov Zərbah
II yer-Hümbətov Saleh,Almədədli Cəfər
III yer-Kamilov Həzrət,İsmayılov Emin
III yer- Mirzəliyev Əliəkbər, Kərim Əmir

Qoşa qarışıq:
I yer-Babayev Vaqif,Babazadə Xədicə
II yer-Almədədli Cəfər,Həbibova Yasəmən
III yer-Muradov Zərbah,Banluyeva Minəxanım
III yer-Hümbətov Saleh, Aslanzadə Mehri

Fəxri kürsüyə qalxan idmançılara Azərbaycan Gənclər və İdman Nazirliyinin diplom və medalları, həmçinin, Azərbaycan Stolüstü Tennis Federasiyasının hədiyyələri təqdim olunub.

İyunun 27-dən 29-dək stolüstü tennis üzrə ölkə birinciliyi keçiriləcək. Quba Olimpiya İdman Kompleksində təşkil olunan yarışda 2012-ci il və daha kiçik təvəllüdlü idmançılar bacarıqlarını göstərəcəklər. Üç gün davam edəcək birincilikdə paytaxt Bakı ilə yanaşı Sumqayıt, Salyan, Şirvan, Quba, Qobustan, Şamaxı, Şabran, Qax və Şəkidən ümumilikdə 100-dən artıq stolüstü tennisçi qələbə uğrunda mübarizə aparacaq. İştirakçılar şəxsi, qoşa və qarışıq qoşa növlərində qüvvələrini sınayacaqlar. Ölkə birinciliyində fəxri kürsüyə qalxan idmançılara Azərbaycan Gənclər və İdman Nazirliyinin diplom və medalları, həmçinin, Azərbaycan Stolüstü Tennis Federasiyasının hədiyyələri təqdim olunacaq.

Stolüstü tennisçilərimiz Rusiyanın Yakutsk şəhərində keçiriləcək "Asiya uşaqları" İdman Oyunlarında iştirak edəcəklər. 2009-2010-cu il təvəllüdlü idmançiların qatılacağı yarışda 4 stolüstü tennisçi bacarığını göstərəcək. Məşqçilər Elnur Hidayətzadə və Səbinə Əzizlinin rəhbərliyi ilə Şəbnəm Mansurova, Xədicə Eylazova, Tunar Bağirov və Uğur Nəzərli qələbə uğrunda mübarizə aparacaq. İyunun 25-də start veriləcək yarışa beynəlxalq dərəcəli hakim Xəyalə Qiyasova da dəvət alıb. Qeyd edək ki, "Asiya uşaqları" İdman Oyunlarına iyulun 7-də yekun vurulacaq.

Stolüstü tennis üzrə seçmə komandamız daha bir beynəlxalq təlim-məşq toplanışındadır. İdmançılarımız bu məqsədlə Qazaxıstana yollanıblar. Çimkənd şəhərində təşkil olunan toplanışda məşqçilər Fərhad İsmayılov və Ramin Cəfərovun rəhbərliyi ilə Vəzir Allahverdiyev, Nihat Məmmədov, Adil Əhmədzadə, Rüstəm Hacılı, Zemfira Mikayılova, Ləman Abdulhəmidova, Mərziyyə Nurmətova və Aylin Əsgərova ustalıq səviyyəsini artıracaq. Qazaxıstan seçməsi ilə bu gün başlanan birgə təlim-məşqlər mayın 31-də yekunlaşacaq. Qeyd edək ki, bu toplanış qarşıdakı beynəlxalq yarışlara hazırlıq məqsədi daşıyır.

Yeniyetmə stolüstü tennisçilərimiz Avropa birinciliyinə qatılacaqlar. Seçmə komandamız bu məqsədlə Rumıniya paytaxtına yollanıb. Buxarest sınaqlarında 4 idmançımız bacarığını göstərəcək. Onur Quluzadə, Şakir Qədirov, Yağmur Məmmədli və Banu Baytallı seçmə komandanın məşqçiləri Mixail Timofeyev və Elnur Hidayətzadənin rəhbərliyi ilə qələbə uğrunda mübarizə aparacaq. Yarışlara mayın 22-də start veriləcək. Qeyd edək ki, beynəlxalq dərəcəli hakim Zaur Mikayılov da Avropa birinciliyinə dəvət alıb. Təcrübəli hakim yarışın oyunlarını idarə edəcək.

2014-cü il təvəllüdlü və daha kiçik stolüstü tennisçilərin ölkə turniri başa çatıb. Sumqayıt şəhərində yerləşən “Qarabağ NN” stolüstü tennis klubunda keçirilən yarışda Bakı və Sumqayıt idmançıları ilə yanaşı, Salyan, Şirvan və Şabrandan ümumilikdə 70-ə yaxın stolüstü tennisçi bacarığını göstərib. İştirakçılar şəxsi mübarizədə qalib və mükafatçıları müəyyənləşdiriblər. Nəticələrə əsasən qızlardan Mehri Aslanzadə qalib adını qazanıb. O, finalda Banu İmanverdizadəni məğlub edib. Alina
Miradiyeva ilə Yasəmən Həbibova üçüncü yeri tutub.
Oğlanların yarışı Əliəkbər Mirzəliyevin qələbəsi ilə başa çatıb. Həzrət Kamilov ikinci, Saleh Hümbətovla Cəfər
Almədədli fəxri kürsünün üçüncü pilləsinə qalxıb. Fərqlənən idmançılara Azərbaycan Stolüstü Tennis Federasiyasının hədiyyələri təqdim olunub.

Yeniyetmə stolüstü tennisçilərimizi qarşıda daha bir ciddi sınaq gözləyir. Seçmə komandamız bu ay Rumıniyanın paytaxtı Buxarestdə keçiriləcək Avropa birinciliyində mübarizə aparacaq. İdmançılarımız məsul yarışa hazırlığı plan üzrə davam etdirirlər. Bunadək bir neçə beynəlxalq yarış və təlim-məşq toplanışına qatılan idmançılarımız yarış ərəfəsində Çinin Şanxay şəhərində təşkil olunan toplanışda iştirak edəcəklər. Onur Quluzadə, Şakir Qədirov, Yağmur Məmmədli və Banu Baytallı seçmə komandanın məşqçiləri Mixail Timofeyev və Elnur Hidayətzadənin rəhbərliyi ilə mayın 9-dan 17-dək Şanxay Stolüstü Tennis Mərkəzində hazırlıq keçəcək. Qeyd edək ki, Avropa birinciliyinə mayın 22-də start veriləcək.