Azərbaycan Stolüstü Tennis Federasiyasının Veteranlar Şurasının təşkilatçılığı ilə 19 yanvar - 19 aprel tarixlərində keçirilən yarış klub mədəniyyətinin inkişaf etdirilməsi, stolüstü tennisin təbliği və kütləviləşdirilməsi, gənclərin bu idman növünə marağının artırılması məqsədi daşıyıb. Ölkənin müxtəlif bölgələrindən olan və fərqli idman klublarını təmsil edən 50-dən çox idmançı komanda yarışlarında mübarizə aparıb.
60-dan çox komanda oyununun nəticələrinə əsasən 11 heyyət arasında ən yüksək nəticə əldə edən 3 komanda müəyyənləşib.
1-ci yeri "Bakı Stolüstü Tennis Klub"nu təmsil edən "Kapital" komandası (Elşad Vahidov (K), Tərlan Adıgözəlov, Fikrət Paşayev, İlham Hüseynov) tutub.
2-ci pillədə "Xəzri" klubunu təmsil edən "Xəzri 1" komandası (Samir Həsənov (K), Vaqif Mamedov, Zaur Mikayılov, Zakir Aslanov) qərarlaşıb.
3-cü yerin sahibi isə "Təhsil" klubunu təmsil edən "Ata" komandası (Elçin Mustafayev (K), Mahir Cəbiyev, Samir İsgəndərov, İsmayıl Mirzəliyev, Rahib Səfərəliyev) olub.
Mükafatlandırma mərasimi aprelin 21-də "Şua" idman kompleksində keçirilən Veteran idmançıların ölkə çempionatı çərçivəsində təşkil olunub. Qalıb komandaların idmançılarına diplomlar və pul mükafatı təqdim edilib. Turnirin ənənəviliyini qorumaq məqsədilə qalıb komandaya rəmzi keçici kubok da verilib.

Stolüstü tennisçilər Onur Quluzadə ilə Yağmur Məmmədli növbəti beynəlxalq yarışda bacarığını göstərəcək. Söhbət Fransanın Mets və Belçikanın Spa şəhərlərində təşkil olunan “WTT Youth Contender” turnirindən gedir. Seçmə komandamızın üzvləri məşqçilər Mixail Timofeyevlə Elnur Hidayətzadənin rəhbərliyi ilə yarışa qatılacaqlar. Bu gün start verilən turnirlərə aprelin 28-də yekun vurulacaq. Qeyd edək ki, Onur Quluzadə növbəti sınaq ərəfəsində Lüksemburqda keçirilən anoloji turnirdə bürünc medala layiq görülüb. İstedadlı idmançı Belçika sınaqlarına da bu günlər təlim-məşq toplanışında olduğu Lüksemburqdan yollanıb.

Veteran stolüstü tennisçilər arasında ölkə çempionatına yekun vurulub. “Şüa” idman kompleksində təşkil olunan yarışda Bakı, Sumqayıt, Gəncə, Şəmkir, Tovuz və Gədəbəydən ümumilikdə 60-a yaxın usta idmançı bacarığını göstərib. Budəfəki çempionatda kişilər 4, qadınlar 1 yaş qrupunda mübarizə aparıblar. Şəxsi mübarizədə kişilərdən Vaqif Məmmədov, Elşad Vahidov, İlham Ağayev, Səxavət Heydərov, qadınlardan Xəyalə Qiyasova 1-ci yeri tutub. Qoşa yarışlarda isə Zaur Mikayılovla Mahir Cəbiyev fəxri kürsünün 1-ci pilləsinə qalxıb. Onlar finalda İlham Ağayev – Xəyalə Qiyasova tandeminə qalib gəliblər.
Fərqlənən iştirakçılara Azərbaycan Stolüstü Tennis Federasiyasının mükafatları təqdim olunub.

Bu gün veteran stolüstü tennisçilər arasında ölkə çempionatına start verilib. “Şüa” idman kompleksində təşkil olunan yarışda Bakı, Sumqayıt, Gəncə, Şəmkir, Tovuz və Gədəbəydən ümumilikdə 60-a yaxın usta idmançı bacarığını göstərir. Budəfəki çempionatda kişilər 4, qadınlar 1 yaş qrupunda mübarizə aparırlar. İdmançılar həm, şəxsi, həm də qoşa yarışlarda qalib və mükafatçıları müəyyənləşdirəcəklər. Çempionatın final görüşləri sabah keçiriləcək. Fərqlənən iştirakçılara Azərbaycan Stolüstü Tennis Federasiyasının mükafatları təqdim olunacaq.

Stolüstü tennisçi Onur Quluzadə daha bir beynəlxalq yarışın mükafatını qazanıb. Söhbət Lüksemburqda keçirilən “WTT Youth Contender” turnirindən gedir. İlkin mərhələdə Almaniya, Fransa, Lüksemburq və Monqolustan təmsilçilərinə qalib gələn yeniyetmə idmançı qrup səddini lider kimi adlayıb. 1/8 finalda isveçli, 1/4 finalda isə fransalı rəqibini də mübarizədən kənarlaşdıran stolüstü tennisçimiz yarımfinalda digər fransalı rəqibinə 2-3 hesabı ilə uduzaraq turnirin bürünc medalına layiq görülüb. Qeyd edək ki, bu, Onur Quluzadənin cari mövsümdə beynəlxalq yarışlarda qazandığı 5-ci mükafatdır.